Kreu i Emergjencave Civile Haki Çako ka raportuar në Komisionin e Sigurisë Kombëtare ku adresoi të gjitha nevojat financiare të këtij institucioni.
I pyetur nga anëtarët e këtij komisioni mbi tërmetin e 21 shtatorit, Çako tha se “ka filluar puna për rindërtimin e 233 banesave në bashkitë Durrës, Shijak, Krujë, Rrogozhinë, Kavajë, Kamëz ashtu sikurse një pjesë Bashkia e Tiranës ka marrë përsipër dhe ka filluar t’i bëjë. Vlera totale e dëmit lidhet ngushtësisht me administrimin në total të dosjeve që do duhet të vëmë në dispozicion të Agjencisë Kombëtare. Për momentin nuk mund të jap dot një vlerë të saktë”.
Kreu i Emergjencave, shtoi se “ka qenë një vit i ngarkuar me fenomene të fatkeqësive natyrore por janë fenomene që nuk mund të parashikohen por nuk mund të parashikohen dhe në planifikimin e buxheteve”.
“Në këtë kuadër, me lejoni të theksoj dhe t’ju bëj me dije se qeveria shqiptare, në tërësinë e investimeve për vitin 2019 ka rreth 1 miliard lekë. Ne shpresojmë dhe urojmë që 2020 të karakterizohet me sa më pak fatkeqësi që do na mundësojë të kompensojmë barrën e detyrimeve të mbetura. Të gjitha dosjet, i gjithë dokumentacioni përkatës për të gjitha fatkeqësitë, janë të identifikuara, të administruara dhe sipas mundësisë financiare do bëhet dhe trajtimi”, tha Çako.
/a.r
