Kryetari i Partisë Demokratike Lulzim Basha duket se është tërhequr disi nga deklaratat e bëra më parë se PD është anëtare me të drejta të plota e Partisë Popullore Evropiane. I pyetur nga gazetarja Arta Tozaj, lidhur me “anëtarësimin me të drejta të plota të PD-së në PPE”, Basha iu përgjigj se “anëtarësim me të drejta të plota do të ndodhë kur Shqipëria të jetë anëtar i BE-së”.
Pak kohë më parë Basha pati shkruar në rrjetet sociale se PD është votuar unanimisht si anëtare me të drejta të plota në Partinë Popullore Europiane. Këtë vendim, Basha e konsideroi si një sukses dhe vlerësim nga grupi më i fuqishëm i Bashkimit Europian dhe mbështetje për aksionin opozitar të PD-së ndaj politikave të qeverisë “Rama”.
Në fakt, një kontroll në faqen zyrtare të PPE-së tregon se PD është bërë anëtare e asociuar dhe jo anëtare me të drejta të plota e PPE.