Një person i cili tentoi të fuste heroinë në burgun e Fushë Krujës, përfundoi në pranga pas kontrollit që iu bë para se të hynte në takimin e planifikuar me një të dënuar.
Policia e Durrësit në bashkëpunim me atë të burgut të Fushë Krujës arrestuan në flagrancë A. N., 35 vjeç, banues në Durrës.
Gjatë ditës së djeshme, e enjte, gjatë kontrollit të shtetasve që hyjnë për të takuar familjarët e tyre që vuajnë dënimin në ambientet e burgut, e kapën në flagrancë duke futur 10 gramë lëndë narkotike të dyshuar heroinë, të cilat i kishte futur në xhepin e një xhupi.
Në cilësinë e provës materiale u sekuestrua lënda narkotike.
Ndaj të dyshuarit hetimet janë në vijim për veprat penale “Prodhimi dhe shitja e narkotikëve” dhe “Futja ose mbajtja e sendeve të ndaluara në institucionin e ekzekutimit të vendimeve me burg”.
/a.r
