Policia e Durrësit godet një tjetër rast të trafikut ndërkombëtar të drogës. 111 kilogram kanabis u sekuestrua në një makinë në portin e Durrësit.
Sipas forcave blu droga ishte e ndarë në 66 pako dhe ishte fshehur në karrocerinë e një makine ndërsa policia arrestoi drejtuesin e mjetit Artur Gjergji, 27 vjeç , banues në Durrës. “Pas kontrollit në Skaner të automjetit tip “Renault”, me targë AA241ND, ku u dallua një send i dyshimtë, e kanë kaluar këtë automjet për kontroll të imtësishëm në vijën e dytë. Nga kontrolli i imtësishëm i kryer në vijën e dytë në krye të karrocerisë në brendësi të saj u gjetën të fshehura 66 pako të mbështjella me natriban, gjithsej 111 kilogramë lëndë narkotike e dyshuar Cannabis Sativa” bën me dije informon policia e Durrësit.
Materialet proceduriale i kaluan Prokurorisë së Krimeve të Rënda për veprën penale “Trafikimi i narkotikëve” parashikuar në nenin 283/a të Kodit Penal.
