Një 27-vjeçar i shpallur në kërkim për dy vepra penale është arrestuar nga policia në Pukë. Prej dy vitesh ishte në kërkim pasi më 17.08.2018, në qytetin e Berlinit – Gjermani, tmerroi një 32-vjeçare, e cila ka qenë duke shkuar në banesën e saj dhe gjatë rrugës është sulmuar nga i riu shqiptar, i cili ka ushtruar dhunë ndaj saj duke tentuar të kryente marrëdhënie seksuale me dhunë dhe i ka marrë portofolin me para, të cilin e kishte në çantën e saj.
Pas njoftimit të banorëve nga ndihma e kërkuar nga 32 vjeçarja, autori i veprës penale është larguar nga vendi i ngjarjes, por në vendngjarje janë gjetur prova materiale e shkencore, nëpërmjet të cilave ai është identifikuar nga Policia.
Ditën e sotme, nga strukturat e Komisariatit të Policisë Pukë, u bë kapja dhe ndalimi i personit në kërkim K.D., 27 vjeç, lindur dhe banues në Njësinë Administrative Qafë Mali, Bashkia Fushë Arrës.
Ndaj tij shtetasi Gjykata e Rrethit Gjyqësor Pukë ka caktuar masën e sigurimit “Arrest në burg”, i dyshuar për kryerjen e veprave penale “Marrëdhënie seksuale me dhunë me të rritura” dhe “Vjedhje me dhunë”.
Dosja nga Prokuroria e Berlinit në Gjermani është dërguar së bashku me provat materiale në Prokurorinë e Rrethit Gjyqësor Pukë, në ngarkim të shtetasit K.D., banues në Fushë Arrës, i pandehur dhe në kërkim ndërkombëtar.
Prokurori ka regjistruar procedimin penal Nr.55, datë 16.11.2021.
Gjykata e Rrethit Gjyqësor Pukë më datë 26.11.2021, ka caktuar ndaj tij masën e sigurisë “Arrest në burg”.
/b.h
