Shtohen zërat që vijnë nga Greqia për një tension të ri mes shtetit helen dhe Shqipërisë. Këtë radhë është gazeta tjetër greke, ‘Greek Report’ e cila thekson se kryeministri Aleksis Tsipras ka në axhendën e tij një vizitë në Tiranë në datën 26 maj në kuadër të Samitit të Procesit të Bashkëpunimit në Europën Juglindore (SEECP)
Pas “Kathimerini” edhe “Greek Report” shprehet se kjo vizitë vjen në kuadër të pretendimit grek se Shqipëria po pengon kërkimet greke për naftë në detin Jon. Dhe sipas të përditshmes, Shqipëria kërkon ndryshim të kufirit detar me Greqinë dhe kjo është e nxitur nga qarqet që duan “Shqipërinë e Madhe”.
Gazeta ndalet edhe në rolin e Turqisë në Shqipëri, dhe më konkretisht vizitës së Presidentit Rexhep Erdogan në Tiranë. Madje “Greek Report” nënvizon edhe faktin e prezencës së kreut të PDIU-së Shpëtim Idrizi në vizitën e Erdogan, dhe kjo sipas helenëve është e lidhur me çështjen e Çamërisë.
“Pas ankesës së Tiranës zyrtare, Ministri i Jashtëm Nikos Kotzias po merr parasysh që të mos marrë pjesë në Samitin e Procesit të Bashkëpunimit në Europën Juglindore (SEECP ) në Tiranë të premten .Analistët diplomatike thonë se një masë e tillë reagimi do t’i japë qeverisë shqiptare një alibi për të vazhduar provokimet dhe të izoluar Greqinë nga fqinjët e saj” . shkruan “Greek Reporter”
