Acarimi i marrëdhënieve dypalëshe midis Turqisë dhe Rusisë, pas rrëzimit të avionit SU 24, është pasqyruar edhe në aktivitete që skanë lidhje me politikën, siç është futbolli. Mësohet se Rusia ka vendosur të mos lejojë në kampionatin e saj të futbollit lojtarë me origjinë nga Turqia.
Ministri i Sporteve, Vitali Mutko, vendosi që klubet në kampionatin rus të futbollit të mos blejnë asnjë futbollist turk në merkaton e janarit. Vendimi në fjalë nuk parashikon dëbimin e lojtarëve që janë tashmë nën kontratë me klubet ruse.
“Klubet ruse nuk do të mund të blejnë lojtarë turq në janar. Do të mund të vazhdojnë të luajnë këtu ata futbollistë që e kanë tashmë një kontratë, por në të ardhmen ata nuk do të qëndrojnë më”, ishte deklarata e Mutkos për agjencinë R-Sport.
Pak ditë më parë qeveria ruse vendosi bllokimin e lëvizjes së lirë të shtetasve turq, të cilët tashmë nuk mund të udhëtojnë drejt Rusisë pa viza.
