Kastrioti bën çorbë fundin e renditjes në Superiore, sepse ka mundur 1-0 Tiranën dhe tashmë ka futur edhe bardheblutë në vorbullën e frikshme të rënies nga kategoria.
Takimi ka nisur me tension që në fillim, pasi sulmuesi i bardhebluve, Michael Ngoo, u largua nga fusha e lojës, pas vetëm 15` minutash.
Shkak i zëvendësimit nuk ishte as ndonjë dëmtim i lojtarit dhe as ndëshkim nga arbitri, por zgjedhje e stafit tenik, pasi Ngoo u shfaq shumë i tensionuar në tapetin e blertë.
I gjithë tensioni u krijua në minutën e tetë, kur Ngoo u ndëshkua me kartonë të verdhë, pasi goditi një nga lojtarët kundërshtarë, situatë e cila krijoi shumë tension në fushë, pasi lojtari shau dhe tifozët vendas.
Për të mos rrezikuar më tej, stafi teknik hodhi në fushën e lojës Grent Halilin në vend të Michael Ngoo. Pas këtij momenti gjërat qetësohen, skuadrat shfaqen më të qeta në fushë, por pa rrezikuar në asnjë moment seriozisht portat respektive.
Në minutën e 27-të erdhi episodi që vendosi ndeshjen, sepse Kastrioti fitoi një penallti tepër të dyshimtë. Ishte Mawejje ai që e shkaktoi, pasi në tentativë për të pastruar zonën kreu ndërhyrje të gabuar ndaj kundërshtarit, ose të paktën kështu e mendoi arbitri Olsi Sokoli, sepse realisht pamjet nuk tregojnë faull për penallti.
Herald Marku, i qetë, nuk gaboi dhe me rezultatin 1-0 është mbyllur pjesa e parë, me Kastriotin që ishte më kërkues dhe agresiv në raport me rivalin, që u shfaq më i përgjumur në fushë.
Tirana është më agresive në pjesën e dytë, ndërsa Kastrioti shfaqet disi më i tërhequr. Mema kërkon më shumë sulme nga krahët, të cilët tentojnë të shtyjnë në drejtim të portës kundërshtare.
Megjithatë, me kalimin e minutave, është Kastrioti që rimerr frenat e lojës në dorë, duke vënë përsëri në vështirësi Tiranën. Bledar Devolli kryen ndërrimet, duke i dhënë më shumë freski skuadrës, e cila, pas minutës së 70`, kontrollon fushën dhe rrezikon më shumë se rivalët.
Tirana ka një shans të artë për të barazuar në minutën e 79`, por Grent Halili është i pafat. Një top i ardhur nga këndi, përfundon në këmbën e Halilit, i cili shumë pranë portës gjuan me thembër, por topin e ndal shtylla, duke mos i dhënë mundësi sulmuesit të vendoste barazpeshën në fushë.
Tirana përballet me Laçin, pas pushimit për ndeshjet e kombëtares, ndërsa Kastrioti luan kundër Teutës. Bardheblutë mbeten me 29 pikë në vend të shtatë, ndërsa Kastrioti me 24 pikë mban vendin e fundit në renditje.
KATEGORIA SUPERIORE
Java e 25
Kastrioti-Tirana 1-0
Goli: Marku 27` penallti
Stadiumi “Redi Maloku” Fushë-Krujë
Kastrioti: Çekrezi, Husein, Bojom, Çela, Ndreca, Ymeraj, Shehu, Marku (Henry 70`), Roxher, Kalaja, Vatnikaj (Bardhi 69`). Trajner: Bledar Devolli
Tirana: Abibi, Kërçiku, Atinga, Imami, Hoxhallari, Maveje (Goxha 78`), Karabeci, Hasani, Doka, Greca (Sentamu 59`), Ngo (Halili 15`). Trajner: Ardian Mema
Gjyqtarë: Olsi Sokoli, Rejdi Avdo, Renato Malaj, Olsid Ferataj
Delegat: Lysien Nurishmi; Vëzhgues: Arjan Mali
Kartonë të verdhë: Lukman 38`, Çela 65`/ Maveje 3`, Ngo 6’, Krababeci 32`, Sentamu 90+3`
