“Telekom Albania” i përgjigjet skërkesës së ALBtelecom lidhur me çështjen e emrit, duke i shprehur se nuk ka shkelur asnjë ligj tregtar. Të kontaktuar nga “BalkanWeb”, nga kjo kompani sqarojnë së janë zbatuar me përpikëri të gjitha kërkesat ligjore rregullatore tregtare, dhe se emri i kompanisë “Telekom Albania” është i regjistruar në QKR.
Një ditë më parë kompania “ALBtelecom” ka kërkuar që “Telekom Albania” të ndryshojë emrin, pasi sipas tyre shkel ligjet tregtare. Por sipas “Telekom Albania” ky reagim është i pavend, pasi “nuk mund të pretendohet zotërimi i fjalëve ‘Telekom’ dhe ‘Albania’”.
“Me sa duket, subjekti në fjalë po përpiqet të krijojë një avantazh komercial nëpërmjet krijimit të një lidhje të mundshme me emrin tonë. Në jemi krenarë për logon tonë të re “T”, për ngjyrën tonë të re magenta dhe vlerat e padiskutueshme që i lidhin ato me brandin “Telekom” në Evropë dhe në Shtetet e Bashkuara. Mbi të
gjitha,” Telekom Albania” është mëse i angazhuar të kënaqë kërkesat e abonentëve me cilësinë dhe të rejat më të fundit të teknologjisë, nëpërmjet të cilave ky brand është i njohur në të gjithë botën”, theksohet në reagimin e “Telekom Albania”. Por kompania “ALBtelekom” thotë se në rast e mosndryshimeve përkatëse të emërtesës, “është gati për të përdorur të gjitha të drejtat ligjore lidhur me këtë çështje”.
“Albanian Telekom/Telekomi Shqiptar nuk është vetëm një emër kompanie, por gjithashtu edhe një pronë historike e Shtetit Shqiptar. Fakti që regjistrimi i emrit Telekom Albania, që ngjan identikisht me Albanian Telecom thjesht me një radhitje tjetër të fjalëve, është jo vetëm kundër ligjeve tregtare në fuqi, por edhe kundër kodeve të QKRsë dhe praktikave të Autoritetit të Konkurrencës”’, theksohej në reagimin e djeshëm të “ALBtelecom”.
