Pasi një pjesë e madhe e aktorëve që në fillim ishin kundër projektit për teatrin e ri janë tërhequr, është opozita ajo që përpiqet ta mbajë gjallë si kauzë.
Edhe protesta çdo pasdite jashtë ambjenteve të teatrit duket më tepër si një organizim i PD se sa i aktorëve apo shoqërisë civile. Një ditë më parë atje ishte edhe kreu i PD Lulzim Basha, i cili paralajmëroi betejë të ashpër brenda dhe jashtë sallës së teatrit për të bllokuar projektligjin që i hap rrugën zbatimit të projektit.
Pikërisht sot, kjo pritet të jetë edhe çështja më e nxehtë e seancës parlamentare. Basha u bëri thirrje dje qytetarëve, aktorëve dhe pjesëtarëve të shoqërisë civile t’i bashkohen protesës që do mbahet sot jashtë sallës së Parlamentit në momentet kur do të mbahet seanca.
Ndërkohë, demokratët pritet të kundërshtojnë ashpër projektligjin me debate në sallë. Pasi nuk kanë forcë për ta ndalur miratimin e projektligjit me votë, opozita pritet të vërë në zbatim skenarin e ndjekur prej kohësh, atë të bllokimit të seancës.
“Do të bëjmë gjithçka që ligji të mos kalojë”, tha dje Basha në protestën te teatri. Kjo e sotmja pritet të jetë një seancë vërtetë e tensionuar./a.m.
