“Tartufi”, “Lufta në kohën e dashurisë”, koncerti “Different trains” dhe “Gruaja në dritare” janë 4 shfaqjet që Teatri Kombëtar ka si pjesë të kalendarit të aktiviteteve kulturore, aktivitete këto të cilat do të shoqërojnë miqtë e teatrit gjatë këtij muaji.
Në 3 tetor 2015 ora 19:00 do të jetë pikërisht premiera “Tartufi”, e cila do të çelë edhe shfaqjet e muajit në TK.
Vepra e Molierit, komedia e sjellë në formë moderne nga regjisori Erion Kame dhe me një kast të mrekullueshëm aktorësh si Laert Vasili, Ligoraq Riza, Justina Aliaj, Rajmonda Bulku, Olta Daku, Lulzim Zeqja, Vasjan Lami, Niada Saliasi, Dasara Xhangolli, Genti Deçka, Mehdi Malka dhe Vangjel Toçe do të vijë si një dhuratë për kënaqësinë e nostalgjikëve të teatrit klasik.
Ndërkohë që në 15 tetor 2015 do të jetë radha e Teatrit Kombëtar të Kosovës, i cili do të ngjitet në skenën e Teatrit Kombëtar Tiranë me shfaqjen “Lufta në kohën e dashurisë”.
Shfaqja më e re e Qendrës Multimedia, pas premierës së saj të suksesshme në datën 5 maj (2015) në Teatrin Kombëtar të Kosovës, udhëton drejt Tiranës. Autori Jeton Neziraj, regjisorja Blerta Neziraj dhe aktorët Aurita Agushi, Shengyl Ismaili, Shkelzen Veseli, Albulena Kryeziu, Molikë Maxhuni, në shfaqjen “Lufta në kohën e dashurisë” sjellin në kryeqytet historinë e katër grave të çuditshme të Kosovës që do të rrëfejnë intimitetet, pasionet, marrëzitë, sekretet dhe dëshirat e tyre.
Edhe të apasionuarit e muzikës do të dëgjojnë në sallën e TK-së në datën 23 tetor 2015 ora 19:00, koncertin “Different trains”.
Ndërkohë që “Gruaja në dritare” do të jetë edhe shfaqja, e cila do të përmbyllë aktivitetet e tetorit në Teatrin Kombëtar.
Drama e shkruar nga dramaturgia Artë Arifit pasi doli në pah me vlerësimin në aktivitetet kulturore “Netët e leximit të dramës shqipe” e pasi kaloi edhe provat me shfaqjet e saj gjatë muajit maj 2015, rikthehet edhe në tetor në skenën e Teatrit Kombëtar.
