Një tjetër person është arrestuar nga Policia e Tiranës si i përfshirë në ngjarjen e ndodhur dy ditë më parë në zonën “Ali Demi” në kryeqytet.
Personi i arrestuar është 26-vjeçari me iniciale G. K., i akuzuar për veprat penale “Veprime që pengojnë zbulimin e së vërtetës”, “Moskallëzimi i krimit” dhe “Deklaratat e rreme përpara oficerit të policisë gjyqësore”.
Gjithashtu në kërkim është shpallur dhe 28-vjeçari Nj. P., i dyshuar si i përfshirë në konflikt.
Njoftimi i policisë:
Specialistët për Hetimin e Krimeve të Komisariatit të Policisë Nr. 1:
-Në vijim të veprimeve procedurale me qëllim dokumentimin e ngjarjes së ndodhur me datë 10.06.2025, rreth orës 23:00, në rrugën “Ali Demi”, kanë arrestuar shtetasin G. K., 26 vjeç, për veprat penale “Veprime që pengojnë zbulimin e së vërtetës”, “Moskallëzimi i krimit” dhe “Deklaratat e rreme përpara oficerit të policisë gjyqësore”, si dhe identifikuan dhe shpallën në kërkim shtetasin Nj. P., 28 vjeç, pasi dyshohet se është përfshirë në konflikt.
Vijojnë hetimet dhe kontrollet për nxjerrjen përpara përgjegjësisë penale të të gjithë shtetasve të implikuar në këtë rast, si dhe për individualizimin e përgjegjësisë së tyre penale;
Ngjarja në fjalë është regjistruar më 10 qershor rreth orës 23:00 në zonën e “Ali Demit” në kryeqytet. Një konfltik mes disa personash degradoi në përdorimin e sendeve të forta si dhe në krisjen e armës së zjarrit.
Në vendin e ngjarjes u gjetën dhe u sekurestruan 1 shkop bejsbolli, 2 gëzhoja, 1 automjet dhe 3 celularë. Gjithashtu në kërkim janë shpallur dhe 4 persona F. D., 36 vjeç, D. Zh., 25 vjeç, M. D., 27 vjeç dhe F. S., 27 vjeç, të përfshirë në konflikt.
