Karakasi u trondit mbrëmjen e së hënës nga të shtëna armësh, në një kohë kur qyteti ndodhet në gjendje tensioni pas sulmit amerikan dhe kapjes së presidentit Nicolás Maduro. CNN ka publikuar disa pamje që tregojnë dritat e zjarrit kundërajror mbi qiellin e kryeqytetit të Venezuelës, ndërsa në video të tjera dëgjohen të shtëna armësh pranë zonës së pallatit presidencial Miraflores.
Një banor, që foli për CNN në kushte anonimiteti, tha se dëgjoi të shtëna pranë bulevardit Urdaneta, afër pallatit presidencial.
Nga ana tjetër, një zyrtar i Shtëpisë së Bardhë tha për CNN se SHBA po ndjek nga afër raportimet për të shtënat në Venezuelë, por theksoi se “SHBA nuk është e përfshirë”.
Diskutime të regjistruara mes grupeve paramilitare të lidhura me regjimin e Maduros, të njohura si colectivos, sugjerojnë se të shtënat lidhen me konfuzion mes njësive të sigurisë pranë pallatit Miraflores. Një anëtar i njërit prej grupeve dëgjohet duke kërkuar mbështetje pas “përplasjeve” në zonë, duke thënë se “u dëgjuan disa të shtëna”.
Më pas, një tjetër anëtar shpjegon se bëhej fjalë për një “keqkuptim” dhe se situata ishte qetësuar. Në një komunikim të mëvonshëm, një prej tyre tha se policia e Miraflores dhe rojet e pallatit kishin qëlluar ndaj një droni që fluturonte në zonë, por se gjithçka tashmë ishte “nën kontroll”.
