Rreth 500 të rinj italianë dhe të huaj kanë protestuar në mënyrë të dhunshme pasditen e sotme në Milano të Italisë kundër panairit të ushqimit “EXPO Milano 2015”. Siç raportojnë mediat italiane, të rinjtë e kanë nisur protestën e tyre të paralajmëruar në orën 15:30, ku fillimisht janë konfliktuar fizikisht me policinë.
Më pas ata kanë mbuluar fytyrën, ndërsa kanë nisur të sulmojnë me mjete të rënda, dhe me bomba molotov ndaj polcisë, duke djegur dhjetëra makina.
Në të ashtuquajturën “No EXPO Mayday Parade” të rinjtë protestojnë kundër mungesës së sigurisë në punë. Në deklaratat e tyre të mëparshme ata kanë paralajmëruar se do të lënë punën dhe do të marrin pjesë në një protestë masive dhe të dhunshme kundër kushteve dhe sigurisë në punë.
Sipas policisë gjendja është alarmante, ku frika më e madhe e tyre është degradimi i mëtejshëm i protestëts në sulme ndaj dyqaneve dhe bankave që ndodhen aty pranë.
Kjo protestët vjen me rastin e 1 Majit, ditës së punëtorëve, ndërsa pak ditë më parë si shkak i mungesës së kushteve të punës, humbi jetën edhe 21 vjeçari shqiptar Klodian Elezi.
Kjo shkaktoi pakënaqësi tek të rinjtë ku një pjesë prej tyre lanë punët për shkak të vdekjes së të riut shqiptar. Mediat italiane nuk kishin transmetuar vdekjen e shqiptarit çka nxiti të rinjtë në pakënaqësi. Megjithatë ata u rikthyen në punë pasi iu premtuan kushte më të mira pune si dhe pagesë më e mirë.
Kjo zgjati pak ditë pasi menjëherë pakënaqësitë u shtuan për shkak se sipas tyre, qeveria italiane po shpenzon shuma marramëndëse për panaire dhe jo për problemet që ata i shqetëson.
Redaksia Online
(JavaNews.al)
