Huliganët, të cilët javën e kaluar vranë një 19-vjeçar në Greqi, po thyejnë heshtjen dhe po tregojnë se çfarë ndodhi në të vërtetë. Në këtë mënyrë autoritetet kanë një panoramë më të qartë se i ndodhi ngjarja dhe se “çfarë bëri secili prej tyre”.
Në lidhje me ngjarjen janë arrestuar të dielën 8 persona. Bëhet fjalë për 7 grekë dhe 1 shqiptar të moshave nga 19 deri 22 vjeç, të cilët janë identifikuar si pjesëmarrës në sulmin ndaj të riut Alkis Kambanos.
Për ngjarjen janë identifikuar edhe 3 persona të tjerë, përfshirë një tjetër shqiptar, 23 vjeç, i cili u vu në pranga të mërkurën e kaluar dhe dy persona të tjerë, të cilët deri më tani i kanë shpëtuar arrestimit. Një prej të arratisurve është një 20-vjeçar shqiptar i cili pas vrasjes mendohet se është arratisur drejt vendit tonë. Për të është lëshuar një urdhër arresti ndërkombëtar. Kjo e bën që numri i shqiptarëve të përfshirë në këtë ngjarje të rëndë të jetë në 3.
Personi i dytë i arratisur është një 20-vjeçar grek i cili jeton në Athinë. Të gjithë të përfshirët në ngjarje janë fansa të skuadrës së PAOK-ut në Selanik dhe anëtarë të “fan club”-eve të ndryshme. Të rinjtë do të përballen me akuza për vrasje dhe dy tentativa vrasjeje. Ata u paraqitën përpara hetuesisë të hënën dhe iu la një afat për të përgatitur mbrojtjen në gjykatë.
6 prej 8 personave të arrestuar të dielën kanë pasur probleme me ligjin në lidhje me armëmbajtje pa leje, shkaktim dëmi dhe shqetësim i rendit si dhe incidente në stadiume.
23-vjeçari shqiptar që është arrestuar të mërkurën dhe një person tjetër kishin arritur që të arratiseshin në Shqipëri në Mars të 2019-s pasi kishin sulmuar 2 fansa të Arisit, pothuajse shumë pranë vendit ku u vra Kambanos.
23-vjeçari është identifikuar si personi që ka goditur 19-vjeçarin në kokë me një levë. Për më tepër, janë gjetur gjurmët e gishtërinjve të një të riut tjetër mes të arrestuarve të dielën, në thikën që i dha goditjen fatale në kofshë Kambanos, duke prekur një arterie dhe duke i shkaktuar gjakderdhje deri në vdekje.
/a.r
