Nga mbërritja e sportistëve në ceremonitë e dhënies së medaljeve, konferencat e shtypit, e madje edhe trajtimi urgjent gjatë konkurrimit, të gjitha objektet janë gati për hapjen e Lojërave Aziatike të Hangzhou-t zyrtarisht më 23 shtator, shkruan CMG.
Në Pallatin e Sportit të Parkut Sportiv të Kanalit “Gongshu” të Hangzhou-t u zhvillua të mërkurën një veprimtari testimi, “Finalja ekipore në pingpong për femra”.
Ndërkohë, Qendra Komanduese e Lojërave Aziatike e Hangzhou-t, qendra të ndryshme komandimi të specializuara, qendra nënkomandimi, ekipe të specializuara pune dhe të gjitha ekipet e objekteve të konkurrimit dhe ekipet e objekteve të stërvitjes kryen një provë tërësore të përqendruar në shërbimet e ardhjes dhe largimit, funksionimit të fshatit të Lojërave Aziatike, shërbimet mediatike, sigurinë e veprimtarive, organizatimin e konkurrimit dhe ceremonitë e medaljeve.
“Gjatë Lojërave Aziatike, në Pallatin e Sportit të Parkut Sportiv të Kanalit ‘Gongshu’ do të zhvillohen ndeshjet e pingpongut dhe garat e kërcimit breakdancing. Ekipi i vënies në funksionim të objekteve rregullon vazhdimisht çdo aspekt për të siguruar që funksionimi i objekteve të përmbushë kërkesat e Lojërave Aziatike,” tha Wang Xiaochen, anëtar i stafit në Pallatin e Sportit të Parkut Sportiv të Kanalit “Gongshu”.
Në vendet e konkurrimit sportistët përpiqen për të treguar talentin e tyre. Kohët e fundit, gazetarët vizituan disa vende në qytete të tilla si Hangzhou, Ningbo, Wenzhou e Shaoxing ku do të mbahen ndeshjet e garat. Konceptet “i gjelbër”, “inteligjent”, “kursyes” dhe “i qytetëruar” janë të qarta në detaje. Objektet dhe stafi janë gati të mirëpresin Lojërat Aziatike.
