Nga Ben Andoni
Për ata që se dinë: Shqipëria ka 127 parti politike të regjistruara! Të paktën kaq ka pasur në vitin 2015. Ashtu si ndodh pas çdo zgjedhje: Kur fillon puna për auditimin, problemi i madh është se gjysma e partive nuk kanë adresë ose më keq akoma nuk figurojnë fare. Por pse ekzistojnë atëherë? Një pjesë e tyre arrin të marrë deri pak dhjetra vota dhe këto përdoren në kazanin e madh të partive të mëdha, që pastaj i ndihmon për ndonjë punësim apo për ndonjë benefic kryetarët e tyre. Dhe, ajo që thuhet, por nuk provohet dot është se: me zgjedhjet pastrohen shumë para.
Paradoksi nuk mbaron këtu. Nëse Shqipëria ka një ligj për regjistrimin e partive, atëherë nuk ekziston një i tillë për çregjistrimin e tyre. Kjo ka bërë që nëse hap ndonjë manual, ku janë të nominuara partitë pjesëmarrëse, një pjesë jo e vogël e tyre, kanë kryetarë fiktivë, një pjesë të ikur kohësh nga vendi, e më të pakët edhe të vdekur.
Për hir të së vërtetës, krijimi dhe mbajtja e një partie politike është fare e thjeshtë në Shqipëri. Ka një limit me disa mijëra firma (saktësisht 5 mijë firma), mund të krijosh një status, emrin e kryetarit dhe dokumentet duhet të depozitohen në gjykatë. Paradoksi i vërtetë fillon nga vetë KQZ-ja që pranon parti, të cilat kanë të regjistruar si adresë vetëm emrin e qytetit. Kurse ka shumë syresh që shpallin një adresë selie, por që shumica e tyre nuk gjenden. Në fakt, limiti i numrit të anëtarësisë së partisë hiqet nëse partitë e vogla bëhen pjesë e koalicioneve.
Justifikimi i partive të vogla është se e bëjnë fushatën vetëm nëpërmjet rrjeteve sociale dhe komunikimeve telefonike dhe kjo shkruhet edhe në dokumentin e audituesve. Dhe, në fund, ndodh shpesh se shumica e partive të vogla, në të dyja koalicionet e mëdha, kanë deklaruar se nuk kanë pasur aktivitete financiare.
Po çfarë ndodh realisht? Sipas politologëve, arsyeja kryesore e mbajtjes së një numri të madh të partive të vogla politike është punësimi. Kryetarët e vegjël arrijnë marrëveshje me të mëdhenjtë se me atë pak vota që marrin do punësojnë njerëzit e tyre të afërt. E duke ditur se audituesit nuk i vënë fare në diskutim ato që referojnë partitë e mëdha, atëherë ky problem do të vazhdojë pa fund. Ajo që mendohet dhe që është disi e sikletshme të thuhet është se ka dyshime të forta për pastrim parash. Por, kjo është e pamundur të hetohet në Shqipëri, pasi të gjitha strukturat janë të ndërvarura nga shteti politik. (JavaNews)
