Gjatë takimit në Kamzë këtë të Martë, kryeministri Edi Rama pati një thirrje për të rejat socialiste. Këto të fundit duhet t’u vënë një kusht partnerëve apo atyre djemve që janë në fazë njohjeje. Kusht që lidhet direkt me pasaportën europiane dhe votën e 11 Majit…
“Të gjithë gocat që janë këtu që kanë simpatizantë ose të dashur që janë me bindje të tjera, duhet t’u vini kusht. Duhet të thonë, dëgjo ti më pëlqen mua. Po unë të dua ty, të du ty me status të barabartë me çdo lloj të huaji se ndryshe…Të du qytetar europian, jo vetëm kamzali. Ajo që pres prej teje është të vish me mu dhe të votosh si mu! Le të jetë i bukur sa të dojë, i zgjut sa të dojë, po a mund të rrihet me një çun që hidhet në kënetë më 11 Maj?! Ç’e do mo?! Se është çështje karakteri kjo…Unë kam besim që këtu në Kamzë më 11 Maj ju dhe gjenerata tjetër, do ta bëni Kamzën që të shkëlqejë!”, tha Rama.
E thënë me humor, por siç e përsërit shpesh vetë kreu i qeverisë “shakatë janë gjysmë të vërtetat më të mëdha”. E në rast se vajzat e marrin parasysh si këshillë, shumë zemra do “thyhen” ose mbase funksionon ndryshe… Gjithsesi, shpresojmë që politika të mos bëhet faktor në marrëdhëniet romantike!
