Një përgjim telefonik ka qenë çelësi i zbardhjes së krimit makabër të vrasjes së Menduh Kurt-Dedës, në vitin 2017, pas Malit të Dajtit, në Tiranë. 61-vjeçari dyshohet se u dogj i gjallë, pasi u mor peng, u lidh me litar e u keqtrajtua në një zonë të pyllëzuar në Kodër Shupal, për shkak të një borxhi të pakthyer.
Më shumë se 4 vjet pas ngjajes së pazbadhur, Marjeta Karaj është përgjuar teksa kërcënonte një tjetër borxhli me fjalët “Të djeg si Menduhun”, përgjim që ka riaktivizuar hetimin. Pas arrestimit, në përballjen me Gjykatën e Tiranës, 56-vjeçarja Karaj ka mohuar akuzën, duke pretenduar se nuk kishte lidhje me krimin. Qëndrimi i saj nuk e ka shpëtuar nga masa e sigurisë “arrest në burg”.
Të njëjtën masë sigurie gjykata ka dhënë edhe për të arrestuarin tjetër, Gazmir Ngota. Pas arrestimit, Ngota ka pranuar ngjarjen, duke zbardhur detaje nga konflikti i Marjeta Karajt dhe Menduh Kurt-Dedës për borxhin 1 milionë lekë të pashlyer dhe deri tek krimi.
Në sallën e gjyqit, avokati i 56-vjeçares ka pretenduar se Ngota ishte përdorues i narkotikëve dhe i pabesueshëm. Për krimin është shpallur në kërkim edhe Besmir Karaj, djali i Marjeta Karajt, i cili ndodhet jashtë vendit. Sipas Prokurorisë së Tiranës, Menduh Kurt-Deda është marrë peng në zonën e Xhamllikut nga 34-vjeçari Besmir Karaj dhe Gazmir Ngota, ndërsa në keqtrajtimin dhe vrasjen e tij ka qenë prezente edhe 56-vjeçarja, me të cilën kishte pasur më herët një raport intim./m.j
