Amerikanët po ndërmarrin masa ekstreme për të hyrë sërish në TikTok. Përdoruesit u shqetësuan për mbylljen e aplikacionit, madje disa prej tyre kanë ndarë edhe video duke qarë.
Elon Musk madje ka thënë se “po sheh” mundësinë për të rikthyer Vine. Gjykata Supreme vendosi që ndalimi i TikTok do të vazhdojë derisa kompania mëmë, ByteDance ta shesë, por Trump e vonoi këtë vendim.
Një ditë më pas, kur përdoruesit hapën aplikacionin, mund të shihnin një njoftim që falenderonte presidentin e SHBA-së.
Por edhe pse aplikacioni funksionon, nuk mund të shkarkohet nga App Store apo Play Store që do të thotë se përdoruesit që e kanë fshirë, s’mund ta instalojnë sërish.
Ndaj disa njerëz kanë përfituar për të marrë para nga ata që janë të dëshpëruar për ta përdorur, raporton “Metro”. Disa njerëz po shesin celularë në eBay me premtimin se pajisja ka edhe aplikacionin e TikTok të instaluar në të, por kërkojnë një shumë të majme.
Një iPhone 15 Pro Max me TikTok-un e instaluar në të u vendos fillimisht me çmim $6,100 por tani ka shkuar në $16,000. Një iPhone 15 Pro Titanium shitet për $46,800 kurse një iPhone X për $12,300.
iPhone 13 Pro me TikTok të instaluar në East Coast shkon në $50,000. Modelet iPhone 15 dhe 16 që zakonisht shiten $1,200-$1,500 ndërsa ata me TikTok në të variojnë mes $9,000 dhe $46,000.
Këto çmime janë bërë virale në rrjetet sociale dhe përdoruesit kanë dyshime për zgjuarsinë e kujtdo që zgjedh të blejë një produkt që kushton kaq shumë.
