Drejtoria e Përgjithshme të Tatimeve do të monitorojë të gjithë aktivitetit që do të zhvillohen gjatë këtij sezoni veror. Kjo deklaratë ka ardhur pas kontrollit të ushtruar një ditë më parë nga Tatimet, tek një subjekt në Durrës, ku mbrëmjen e djeshme performoi këngëtari amerikan Chris Brown.
“Dje në orën 10 ka filluar monitorimi i subjektit në Durrës. Subjekti kishte të instaluara 4 kasa fiskale, 1 te dera ku pritej bileta dhe 3 në banak. Kishte 37 të punësuar. Në subjekt, punonjësit e Inspektoriatit Tatimor kanë qëndruar për rreth katër orë. Të gjitha të dhënat e konstatuara dje do verifikohen në Tiranë.
Subjekti është i regjistruar në Tiranë dhe do mbahet në monitorim të vazhdueshëm pasi do ketë evente javore. Drejtoria e Përgjithshme ka udhëzuar që në fillim të sezonit drejtoritë rajonale të monitorojnë këto aktivitete në çdo qytet”, thuhet në reagimin e Tatimeve.
Më herët, pati edhe një reagim te kryetarit të Komisionit parlamentar të Ekonomisë, Erjon Braçe i cili kërkoi sqarime nga organet tatimore nëse subjekti privat ka paguar TVSh apo ka bërë evazion fiskal.
“Po lexoj për koncertin në Durrës. Me thënë të drejtën, më bënë përshtypje çmimet, por për tatimet pyetjen e kam: A ishte kush nga tatimet për të vërtetuar xhiron dje në “koncertin” e Chris Brown? Do ta bëj pyetjen edhe zyrtarisht pranë Drejtorisë së Përgjithshme të Tatimeve për të kuptuar shpenzimin e djeshëm, faturimin dhe TVSH e deklaruar”, shkroi Braçe në profilin e tij.
Të shtunën në mbrëmje, reperi i famshëm amerikan Chris Brown performoi në qytetin e Durrësit.
Por ajo që ngjalli habi, ishin çmimet e bërë publike për cilindo që do të dëshironte të shihte këngëtarin e tij të preferuar, të cilat shkonin nga 200 euro deri në 3 mijë euro.
