Punonjësit të cilët për shkaqe të ndryshme, për më shumë se një muaj janë të pezulluar apo të larguar nga puna pa të drejtë page, për muajt e plotë të pezullimit apo largimit, do të deklarohen nga tatimpaguesi në listëpagesë si të larguar nga puna dhe kur të rikthehen në punë të deklarohen të punësuar rishtazi, thuhet në një vendim teknik që Drejtoresha e Përgjithshme e Tatimeve, Brisida Shehaj ka lëshuar për drejtoritë në varësi të saj.
Këto veprime duhet të realizohen me anë të deklarimit në sistemin informatik të organeve tatimore t të dhënave sipas rubrikave të dokumentit, “deklarata e të punësuarve për herë të parë, atyre rishtazi, si dhe të larguarve nga puna”.
Udhëzimi sugjeron që me listëpagesën duhet të deklarohen të dhënat për personat që kanë lidhje me marrëdhëniet e punës, pagën gjatë muajit përkatës, për të cilin tatimpaguesi ka detyrimin për të përllogaritur kontributet për sigurimet shoqërore e shëndetësore dhe tatimi mbi të ardhurat nga punësimi.
Shehaj sqaron se qëllimi thelbësor i deklarimit nga tatimpaguesi i të dhënave të listëpagesës së muajit përkatës është evidentimi i detyrimit të kontributeve të sigurimeve shoqërore të çdo punonjësi, i cili mbi bazën e pagesës së kontributeve ka të drejtën për të marrë përfitimet ligjore nga skemat përkatëse të sigurimeve. (Monitor)
