Nxjerrja e çertifikatave personale dhe familjare online çdo ditë, 24 orë në 24 përmes portalit “E-Albania”, duket se ishte vetëm fillimi i procesit për lehtësimin e peshës së burokracisë shtetërore te qytetarët.
Brenda datës 15 mars, një numër shërbimesh të tjera në varësi të kësaj drejtorie do të ofrohen gjithashtu online.
Tashmë edhe njoftimi për mbajtjen e protestave e tubimeve apo kërkesa për shoqërim nga shërbimet e Policisë Rrugore parashtrohen online. Kjo bën të pamundur shkeljen e të drejtës kushtetuese të tubimit, si dhe rrit transparencën me të cilën vepron Policia e Shtetit në veprimtarinë e saj të përditshme.
Online do të aplikohet edhe për leje qëndrimi, një lehtësim i rëndësishëm për të gjithë shtetasit e huaj rezidentë në Shqipëri.
Një masë e tillë sipas Ministrisë së Brendshme shërben njëkohësisht për të rritur sigurinë në vend, duke regjistruar në kohë reale të gjithë rezidentët.
Midis shërbimeve të automatizuara janë edhe ato që lidhen me vërtetimet për personat e përndjekur politikisht në kohën e diktaturës, si vërtetime për internim/dëbimet, për dënimet politike, për vrasjet pa gjyq, për të arratisurit, për nxjerrjen e të dhënave nga regjistrat e hetuesisë, etj.
Njëkohësisht, janë rreth 60 shërbime të tjera, për të cilat aplikimi tashmë mund të bëhet përmes platformës elektronike. Këtu përfshihen licensa, certifikime personale, certifikime ambienti, autorizime, njoftime, raportime, dorëzime, etj.
