Diplomati Arben Cici, ish-drejtor i kabinetit të Presidentit të Republikës në kohën kur Kryepeshkopi Anastas Janullatos mori shtetësinë shqiptare, ka folur për këtë moment gjatë një interviste në emisionin Log. në News24.
Cici tha se Anastasit i takonte shtetësia shqiptare që nga viti 1992, kur ai u zgjodh Kryepeshkop i Kishës Ortodokse Autoqefale të Shqipërisë.
“Ilir Meta ishte i vendosur për t’ia dhënë shtetësinë kur ishte president. Kryepeshkopi vetë ndihej ngushtë për ta kërkuar dhe thoshte ‘do vijë ajo ditë’. Nuk ka ushtruar kurrë presion,” tha Cici.
Ai tregoi se momenti i dorëzimit të dekretit të shtetësisë ishte shumë prekës për Kryepeshkopin Anastas.
“Ai u përlot dhe tha: ‘Tani do të vdes si shqiptar’,” përfundoi Cici.
