Presidenca ka zbardhur takimin e zhvilluar mes kreut të shtetit Bujar Nishani dhe ambasadorëve DOnald Lu dhe Romana Vlahutin. Në deklaratën e shpërndarë thuhet se takimi u fokusua te shqetësimi i ngritur nga ministri Petrit Vasili për Bordin e ONM
Njoftimi:
Presidenti i Republikës, Bujar Nishani zhvilloi një takim me Ambasadorin e SHBA-ve në Tiranë, zotin Donald Lu dhe Ambasadoren e Delegacionit të BE-së në Tiranë, zonjën Romana Vlahutin.
Në këtë takim u bisedua rreth shqetësimit zyrtar të ngritur nga Ministri i Drejtësisë, zoti Petrit Vasili lidhur me ushtrimin e detyrave të Operacionit Ndërkombëtar të Monitorimit.
Presidenti Nishani bëri me dije, se duke e konsideruar reformën në drejtësi me rëndësi jetike për vendin, e ka mbështetur që në gjenezë, si nismëtar i procesit, duke kulmuar me miratimin konsensual në Parlamentin shqiptar të paketës kushtetuese.
Presidenti Nishani theksoi se e konsideron shumë të rëndësishme mbështetjen konsensuale edhe të fazës së zbatimit të kësaj reforme, duke iu përmbajtur detyrimit të të gjitha palëve për të respektuar në gërmë Kushtetutën e Republikës së Shqipërisë.
Në këtë kontekst, Kreu i Shtetit vlerësoi angazhimin e partnerëve ndërkombëtarë, SHBA dhe BE në realizimin e kësaj reforme permes një procesi të paanshëm, ligjor dhe të besueshëm për qytetarët shqiptarë.
