Së pari, nuk është Basha ai që ka në dorë të intensifikojë shkëmbimet tregtare midis dy vendeve dhe ambasadori rus e di mirë këtë. Prandaj, nëse nuk kanë folur për çështjet tregtare, për çfarë ka folur Basha me emisarin e Putinit?
Së dyti, ligjshëm lind pyetja se çfarë kupton ambasadori Karpushin me parimin e “mosndërhyrjes”. A bëhet fjalë për të njëjtën “politikë asnjëanësie” që Rusia ndoqi duke ndihmuar me “hakera” fushatën e Presidentit Trump, duke pushtuar një pjesë të Ukrainës, duke dislokuar trupa ushtarakë në Siri apo duke inkurajuar një atentat për eliminimin fizik të kryeministrit të Malit të Zi?
Përtej ngjarjeve me interes global, përse Basha nuk i kërkoi Moskës që në emër të mosndërhyrjes në punët e palëve të treta të mos ndërhyjë në interesat jetike të shqiptarëve, duke u tërhequr nga mbështetja aktive që po i jep Gruevskit për sabotimin e platformës së partive shqiptare në Maqedoni dhe nga lobimi i vendosur i Kremlinit për mosnjohjen e Kosovës?
Pyetja e tretë është edhe ajo më e rëndësishmja që Basha duhet t’i përgjigjet: Çfarë interesash të përbashkëta përligjën këtë takim?
Kjo është një pyetje me rëndësi kritike, duke ditur që Rusia është e interesuara numër një që në Shqipëri të dështojë kalimi i vetingut, çka efektivisht do të mbyllte dyert e integrimit europian, duke vendosur Shqipërinë në orbitën e sferave të interesave ruse.
Në pritje të përgjigjeve që me shumë gjasë nuk do të vijnë kurrë, mbetet domethënës fakti që në ditën kur ambasadori amerikan dhe përfaqësuesit e BE-së në Tiranë, i shprehën të gjithë mbështetjen e tyre ministrit të ri të brendshëm, Fatmir Xhafaj, Basha “drekoi” me të dërguarin e Putinit në Tiranë. Një sinjal i qartë, se dielli i Partisë Demokratike po lind gjithmonë e më nga Lindja. TemA
Zhvillimi
Në njoftimin zyrtar të ambasadës nënvizohet se Rusia respekton parimin e mosndërhyrjes në punët e brendshme të vendeve të tjera.
“Bashkëbiseduesit diskutuan për zhvillimet e fundit në politikën shqiptare, si dhe për situatën aktuale në rajon, përfshirë këtu në Maqedoni dhe Kosovë. Një vëmendje e veçantë iu kushtua marrëdhënieve dypalëshe Rusi-Shqipëri. Në këtë kontekst Ambasadori rus nënvizoi se parimi bazë i politikës së jashtme të Rusisë është ai i mosndërhyrjes në punët e brendshme të vendeve të tjera” thuhet në njoftimin e ambasadës.
Sqarimi bëhet pas një deklaratë për armiq të jashtëm që mbështesin protestën e opozitës nga Edi Rama.
“Partnerët tanë do të dëshpëroheshin nëse zhvillimet në Shqipëri nuk do të ecnin mirë por ndërkohë disa të tjerë do të gëzoheshin. Kryetari i opozitës mund të mos i dallojë miqtë dhe armiqtë e Shqipërisë”, tha Rama gjatë një interviste në Top Channel.
Pas tij, Lulzim Basha hodhi poshtë akuzat duke i quajtur përralla.
“Këto deklarata janë përralla. Këto i thotë njeriu që deshi të bëhej diktator por që shqiptarët ja prishën ëndrrën. Unë sot kam patur një takim me ambasadorin e Rusisë në një takim publik. Është një takim në kuadrin e një kontakti normal që PD ka me gjithë përfaqësuesit e huaj në Shqipëri. Kontakte me qarqe të huaja që të diskutoj fatet e Shqipërisë PD nuk ka dhe nuk do të ketë” ishte reagimi i Bashës pas akuzave që iu bënë nga kryeministri.
DEKLARATA E AMBASADES RUSE:
Ambasadori Karpushin zhvilloi një takim me Kryetarin e Partisë Demokratike të Shqipërisë z. Lulzim Basha.
Bashkëbiseduesit diskutuan për zhvillimet e fundit në politikën shqiptare, si dhe për situatën aktuale në rajon, përfshirë këtu në Maqedoni dhe Kosovë. Një vëmendje e veçantë iu kushtua marrëdhënieve dypalëshe Rusi-Shqipëri. Në këtë kontekst Ambasadori rus nënvizoi se parimi bazë i politikës së jashtme të Rusisë është ai i mosndërhyrjes në punët e brendshme të vendeve të tjera.
Z. Karpushin theksoi gjithashtu se Federata Ruse vlerëson se ekzistojnë mundësi të pashfrytëzuara për të rritur bashkëpunimin ekonomik pragmatik mes dy vendeve tona dhe shpreson se në të ardhmen të punohet për të rritur nivelin e këtij bashkëpunimi. Ambasadori shprehu besimin se një impuls të fortë shkëmbimeve dypaleshe ekonomike do t’i japë takimi në muajin prill në Tiranë i bashkëkryetarëve të Komisionit Ndërqeveritar Rusi-Shqipëri për Tregtinë, Bashkëpunimin Ekonomik dhe Tekniko-Shkencor, si dhe sesioni i ardhshëm i këtij Komisioni qe pritet të mbahet ne vjeshtë, kur të formohet qeveria e re shqiptare.
Ambasadori Karpushin dhe z. Basha e vlerësuan si konstruktiv një komunikim të tillë dhe ndanë një bindje të përbashkët se pikëpamjet e ndryshme në disa çështje nuk duhet të pengojnë përpjekjet për të eksploruar fusha të bashkëpunimit reciprok.
ma.me
