Kryetari i Partisë Socialiste të Tiranës zhvilloi një takim me votuesit e herës së parë në Njësinë 1, ku të pranishëm ishin edhe kandidatët për deputet. Saimir Tahiri deklaroi se nuk është e lehtë të bindësh një të ri që do të votojë për herë të parë, pasi shumë prej tyre mendojnë se të gjithë politikanët janë njëlloj.
Sipas Tahirit në 25 qershor përballë shqiptarëve janë dy alternativa, ajo e ‘partiçkave’ dhe alternativa e punës.
‘’Për të rinjtë sot është pak më e vështirë sesa për të rriturit; është pak më e vështirë se ka parti që iu vijnë klasë më klasë e iu premtojnë eskursione, e iu japin teza provimesh, iu premtojnë nota provimesh. Ju premtojnë lloj-lloj historish që s’dua t’i përmend, po çudira nga më të mëdhatë. Ju premtojnë punë falas. Ju premtojnë punë dhe pastaj iu heqin nga puna sa kalojnë zgjedhjet.
Sot ndodh që partitë po sulmojnë rininë në mënyrën më të shëmtuar të mundshme. Sot ndodh që ‘partiçka’ të caktuara po e sulmojnë rininë duke deformuar arsyen pse janë të rinj. Sot ndodh që ‘partiçkat’ po korruptojnë rininë, e kjo nuk duhet të ndodhë.
E midis një ‘partiçke’ që mua më vjen te klasa dhe më thotë, “do të japë provimin po hajde voto për mua”; dhe një partie që mendon si mund të bëjë një shkollë më të mirë, si të ndërtojë një shkollë të re apo si të bëjë një sistem arsimor ku vlerësohet merita, unë zgjedh këtë të dytën’’, theksoi Tahiri.
Duke qëndruar te zgjedhjet e 25 Qershorit, ish-ministri u kërkoi votën të rinjve, duke paralajmëruar se Shqipëria ka shumë për të humbur nëse kthehemi pas.
‘’Edhe unë kur isha në gjimnaz, më ndodhte që ta neglizhoja shkollën. S’e kisha qejf çantën. Mbaja një fletore te xhinset. Nuk ulesha te banka e parë, ulesha te banka e fundit. Këto modele jetoja dhe unë në atë kohë.
Por sot duhet të jetë ndryshe, sepse siç unë kam kuptuar se kam humbur kohë gjatë rrugës, askush prej jush nuk duhet të lejojë që të humbasë kohë gjatë rrugës.
Do të doja shumë që ju ta konsideronit seriozisht vendimin për të vendosur me votë sesi do shkojë jeta juaj nesër. Mendim për të vendosur ju se me votën tuaj çfarë fati do i jepni familjes tuaj nesër, çfarë fati do i jepni lagjes, komunitetit tuaj., çfarë fati do i diktoni Shqipërisë nesër me votën tuaj. Do doja që ta konsideronit mirë’’, shtoi ndër të tjera kreu i PS-së së Tiranës.
