Ministri i Brendshëm Saimir Tahiri i është përgjigjur akuzave të hershme të PD-së duke thënë se ai nuk ka asnjë lidhje me Emiliano Shullazin. Tahiri hodhi poshtë gjithashtu zërat se mes Prokurorisë dhe Policisë nuk ka patur një bashkëpunim të ngushtë për arrestimin dhe hetimin e Shullazit.
“As shullazi dhe askush nuk është mbi ligjin. Policia e Shtetit është e para që ka bërë detyrën një më një duke respektuar çdo kriter ligjor… Nuk di që të ketë një përplasje të policisë dhe prokurorisë dhe as anasjelltas. Prokuroria dhe policia kanë dhënë prova që dinë të bashkëpunojnë për të vënë para përgjegjësisë të gjithë ata që shkelin ligjin. Nuk është interesante se çfarë ndodh në marrëdhëniet mes policisë dhe prokurorisë përsa kohë bashkëpunimi institucional dhe në nivel drejtuesish është mjaftueshmërisht i mirë për të çuar para përgjegjësisë ligjore të gjithë ata që shkelin ligjin”, tha Tahiri.
Deklaratat, ministri i bëri për mediat pas përurimit të zyrës së komisariatit numër 5 në Kamëz, teksa shtoi se kreu i kësaj bashkie Xhelal Mziu “është një i rast ekzemplar i pandëshkueshmërisë”. E për këtë nuk është dëgjuar ndonjë fjalë nga Shqupi, shtoi ai.
“Për SHQUP-in nuk ka dallim, SHQUP-i medon së çdo shqiptar do përtypë ça përtyp SHQUP-i, unë nuk kam kohë të merrem me përtypjet e SHQUP-it”, shtoi ai.
