Ministri i Brendshëm Saimir Tahiri deklaroi se vendi ynë është përgatitur për të përballuar fluks të mundshëm refugjatësh që vijnë nga vendet e Lindjes së Mesme,me destinacion Bashkimin Evropian. Tahiri tha se nuk ka vend për panik dhe se vendi ynë po koordinohet me partnerët europianë për këtë çështje.
“Sot nisem për në Romë. Ne jemi përgatitur për të gjitha,besojmë që kësaj krize nuk ia del dot asnjë vend i vetëm. Duhet bashkëpunim, nuk ka vend për alarm, ne jemi të përgatitur dhe po koordinojmë ngushtësisht me partnerët. Nuk do lejojmë trafikun e qenieve njerëzore, mundësitë janë zero”,- than Tahiri.
I pyetur nga gazetarët për çështjen e Byrosë Kombëtare të Hetimit, kreu i Ministrisë së Brendshme tha se nuk është e rëndësishme varësia, më tepër se sa efektiviteti i kësaj strukture.
“Debati se kush e ka në varësi është debat jo i shëndoshë për luftën ndaj krimit dhe hedhjes poshtë të murit të pandëshkueshmërisë. Rëndësi ka sa efektive do jetë Byroja e Hetimit për të hetuar sa më mirë korrupsionin. Sot DASH vlerësoi punën e qeverisë për luftën ndaj drogës, citoi përkushtimin maksimal për luftën ndaj narkotikëve në rrugën e duhur për rezultate të qëndrueshme”. Tha më tej ministri.
