Lufta ndaj terrorizmit është një luftë e të gjithë vendeve partnere demokratike, dhe kjo nuk duhet politizuar. Me këto fjalë ministri i brendshëm Saimir Tahiri i është drejtuar opinionit publik lidhur me deklaratat e Presidentit të Turqisë Rexhep Tayyip Erdogan.
Duke u ndalur në kërkesën e Erdogan për të nxjerrë jashtë vendit tonë një strukturë paralele terroriste, referuar lëvizjes Gylen, Tahiri tha se kërkesa e Erdogan ka marrë përgjigje, ndërsa apeloi që lufta ndaj terrorizmit nuk duhet të politizohet për axhenda të ngushta kombëtare.
“Është më shumë kërkesë politike që ka marrë përgjigjen e duhur nga instancat përkatëse, sesa kërkesë që ka të bëjë me sigurinë. Sa i takon përpjekjes sonë të përbashkët në luftën kundër terrorizmit, agjencitë ligjzbatuese dhe partnerët tanë, të gjithë bashkë kemi zgjedhur mënyrën e hartimit të përbashkët të katalogut të riskut dhe risqeve në secilin vend, në rajon por dhe në nivel global. Ne i përgjigjemi sfidave në luftën kundër terrorizmit duke bashkëpunuar me partnerët, duke shmangur maksimalisht rrezikun që lufta kundër terrorizmit të politizohet për axhenda të ngushta kombëtare nga cilido qoftë.” tha Tahiri
