Ministrja për Dialog, Edita Tahiri, ka vlerësuar se ka ardhur koha të shikohet mundësia e ndryshimit të formatit të dialogut me Serbinë.
Ajo ka deklaruar se faza në vazhdim e këtij procesi duhet të jetë përmbyllës. Në intervistën për “Epokën e Re”, Tahiri ka mbrojtur procesin e dialogut të Brukselit, duke thënë se ai ka sjellë shumë të mira Kosovës.
Sipas saj, ky proces ka kontribuar dukshëm në realizimin e objektivave strategjike të Qeverisë për forcimin e shtetit brenda dhe jashtë vendit.
Ministrja Tahiri ka folur edhe për ndërtimin e murit ilegal në veri. Ajo ka thënë se institucionet e Kosovës janë duke punuar intensivisht për largimin me kujdes të këtij muri.
“Ju sigurojmë se nuk do të ketë mur dhe se procesi i revitalizimit të urës së Ibrit dhe rruga për këmbësorë në formën e shëtitores do të jetë plotësisht sipas marrëveshjes së Brukselit”, ka thënë Tahiri, përgatiti Koha. (b.an)
