Ministri Tahiri e ka quajtur një “mision historik” reformën në drejtësi dhe në fjalën e tij para anëtarësisë së PS-së, ka theksuar se kjo reformë nuk ka kundërshtarë as nga radhët e votuesve të opozitës.
Tahiri ka nënvizuar se reforma në drejtësi është një domosdoshmëri për vendin, sepse vetëm në këtë mënyrë drejtësia do të veprojë për të gjithë dhe nuk do të shndërrohet në një pazar.
“Ne kemi edhe një mision historik, për të cilin pavarësisht opozitës në parlament, nuk ka asnjë kundërshtar edhe nga vetë votuesit e opozitës: reformën në drejtësi!” tha Tahiri gjatë takimit me anëtarësinë e PS në Tiranë.
Duke folur më tej për nevojën që kanë të qytetarët për të pasur një drejtësi sipas ligjit e jo nivelit të pasurisë, Tahiri theksoi se “ne duhet ta bëjmë këtë vend më të drejtë, ku i varfri dhe i pasuri, të mos kenë të drejta sipas xhepit, por sipas ligjit. Ku i varfri të mos dënohet pse është i tillë, e i pasuri të taksohet pse është i tillë. Ku drejtësia të mos bëjë pazar me ligjin, në kurriz të qytetarëve, por të bëjë drejtësi.”
Në këtë takim,Tahiri ka përsëritur apelin për të kryer reformën në drejtësi dhe ka ftuar anëtarësinë socialiste që të angazhohet për ta fuqizuar përkrahjen popullore për këto ndryshime e reforma.
“Ndaj hajde bisedojmë të gjithë bashkë, hajde i takojmë të gjithë bashkë, hajde flasim me të gjithë ata që duan drejtësi e që nuk durojnë më rropatjen e padrejtësisë, nga punonjësi që do bakshish te gjyqtari që s’i rref çekiçi, po nuk pa lekët! Hajde bëhemi bashkë për të bërë reformën në drejtësi! Ftojini në Partinë socialiste, mbështetës dhe anëtarë, për t’i dhënë fuqi Shqipërisë së drejtë që duam,” – tha ndër të tjera ministri Tahiri.
