Ministri i Punëve të Brendshme, Saimir Tahiri ka folur nga Vlora për reformën në drejtësi. Ai ka kërkuar që kjo reformë të kryhet sa më shpejtë. Tahiri gjithashtu ka akuzuar gjykatat se lirojnë shumë persona të arrestuar nga policia.
“Reforma në drejtësi të kryhet sa më shpejt. Shumë njerëz që arrestohen nga policia, i liron gjykata. Armëmbajtja pa leje duhet të jetë vepër penale. Nëse kjo vepër penale zbutet është e rrezikshme. Për këtë gjë kemi biseduar edhe me ministrin Manjani. Policia, gjykatat dhe Prokuroria të kenë të njëjtin ritëm. Ata që shkelin ligjin të marrin dënimin e merituar”, ka thënë Tahiri, duke kërkuar që puna e policisë të mos gjykohet nga raste të veçanta.
Ai ka theksuar se viti 2015, shënoi rekorde historike kundër kriminalitetit. “Viti 2015, ishte viti me numrin më të ulët të vrasjeve. Reforma në drejtësi të kryhet sa më shpejt. Suksesin e 2015-ës do ta vijojmë edhe këtë vit”, u shpreh ai.
