Qeveria ndryshon çmimet fiskale për shitblerjen e apartamenteve në tregun e lirë për vitin 2016. Nëpërmjet udhëzimit të miratuar nga Qeveria, ndryshojnë vlerat mesatare për shitblerjen e apartamenteve në 12 qarqet e vendit.
Gazeta “Panorama” zbardh të plota çmimet fiskale të Qeverisë për 32 zonat kadastrale të Tiranës dhe për të gjitha qytetet e vendit. Sipas udhëzimit të Qeverisë, kostoja mesatare për sipërfaqe të shfrytëzueshme ishte 39,587 lekë/ metri katror dhe në vitin 2016 bëhet 39,281 lekë/ m².
Pra, me një ulje modeste prej 306 lekë/metër katror. Sipas Qeverisë, ulja ka ardhur për shkak të rënies së çmimit të lëndëve të para që përdoren për ndërtimin e pallateve. Mbi bazën e këtyre çmimeve do të llogaritet vlera aktuale e shtëpisë, apo e thënë ndryshe, vlera e shtëpisë sipas çmimeve të tregut në rast shitblerje. Në rast se një qytetar do të blejë një apartament në 2017 apo do ta shesë atë, çmimet fiskale referencë që do të përdorë Zyra e Regjistrimit të Pasurive së Paluajtshme tashmë do të jenë të ndryshuara. Për disa qytete, çmimet e sipërfaqeve të shfrytëzueshme kanë shënuar ulje, ndërsa për qytete të tjera janë rritur.
Duke iu referuar tabelave të udhëzimit, rritja më e madhe e vlerës mesatare të shitblerjeve të apartamenteve në tregun e lirë është për qytetin e Sarandës. Më parë, çmimi për sipërfaqe shfrytëzimi për këtë qytet ishte 53,300 lekë për metër katror, ndërsa me udhëzimin e ri bëhet 56,000 lekë për metër katror, me një rritje prej 2,700 lekë për metër katror. Ndërsa ulja më madhe e çmimit mesatar për shitblerje është në Kavajë.
Më parë çmimi për sipërfaqe shfrytëzimi për Kavajën ishte 56,384 lekë për metër katror, kurse me udhëzimin e ri bëhet 51,000 lekë për metër katror. Çmimi fiskal ka zbritur 5,384 lekë për metër katror. Ndryshime ka edhe në njësitë administrative të Tiranës.
