Deputetja e Partisë Demokratike, Jorida Tabaku ka shprehur shqetësimin në lidhje me rritjen e çmimeve, ndërsa sipas saj, rrogat dhe pensionet mbeten shumë të ulëta për të mbuluar nevojat bazë të jetesës.
Nëpërmjet një postimi në rrjetet sociale, Tabaku u shpreh se inflacioni ka goditur rëndë familjet shqiptare, duke rritur çmimet e ushqimeve dhe produkteve bazë me 55% për shkak të asaj që ajo e cilësoi si “inflacion socialist”.
“Ju blini çdo ditë më shtrenjtë bulmetin, mishin, zarzavatet dhe çdo produkt të pazarit ditor,” shprehet ajo, duke shtuar se 40% e të ardhurave familjare shkojnë vetëm për ushqim, ndërsa pjesa tjetër mbulojnë faturat e rritura të energjisë dhe ujit, dhe shpenzimet për qiranë e përditshme.
Tabaku po ashtu u ndal edhe tek “hendeku në rritje mes shpenzimeve bazë dhe pensioneve”, të cilat, siç thotë ajo, “nuk arrijnë të mbulojnë as një të dhjetën e nevojave të përditshme të pensionistëve”.
Sipas saj, pensionistët janë më të prekurit nga kriza ekonomike aktuale. Deputetja tha se duhet të ndryshojë modeli ekonomik.
“Një model ekonomik që duhet ndryshuar, duhet të mbështesë sektorë si Arsimi dhe Shëndetësia që duhet të promovojë sektorë si industria që janë në rënie, si Bujqësia që janë në rënie e nuk duhet t’i japë frymë ndërtimit që vjen nga paratë e pista”- tha Tabaku.
Sipas deputetes së PD shqiptarët duhet të largojnë këtë sistem të kompromentuar që nuk i shërben atyre por një pakice.
