Deputetja e Partisë Demokratike, Jorida Tabaku, ishte e ftuara e së premtes në emisionin ‘Java në RTSH’ ku në panelin me analistët Preç Zogaj dhe Lorenc Vangjeli tregoi arsyet e protestës dhe çfarë pritet të shtunën.
Sipas Tabakut, shqiptarët ndodhen në një situatë dramatike ku është vrarë shpresa dhe konsumi ka rënë. Ajo tha se “Zëri i Amerikës” vërtetoi akuzat për punësimet dhe blerjen e votës, që PD i ka denoncuar prej vitesh.
Duke u ndalur te protesta e 16 Shkurtit, deputetja demokrate tha se qeveria po bën çdo gjë për ta penguar pjesëmarrjen e qytetarëve.
“Kurrë nuk ka pasur kaq shumë pengesa për zhvillimin e një proteste. Por të jeni të sigurt se ne kemi marrë dhjetëra mesazhe nga efektivë të policisë që shprehin solidaritet me kauzën e opozitës” – tha deputetja Jorida Tabaku.
Ndërkohë, për analistin Preç Zogaj protesta është një fjalë kyçe për zhvillimin e demokracisë në vend.
Nga ana tjetër, Lorenc Vangjeli tha se dy gjëra pritet të verifikohen orët në vijim.
“Që nuk do të ketë të shtëna në protestë. Dhe që forca e saj qëndron tek qetësia me të cilën do të zhvillohet. E para do të verifikohet si fakt. E dyta është opinion” – tha analisti Lorenc Vangjeli në studion e emisionit ‘Java në RTSH’.
