Kreu i qeverisë ka vijuar edhe ditën e sotme t’i përgjigjet komentuesve në rrjetet sociale.
“Po e prodhojmë vetë energjinë o Ed. Duhet të ulet më tepër, kemi çmimet e Evropës dhe rrogat e Afrikës”, është njëri prej komenteve që kreu i qeverisë ka vendosur t’i përgjigjet.
Në videon nga selia e PS, Rama shprehet se ndryshe nga sa komentuesi pretendon, Shqipëria nuk e prodhon vetë energjinë e nevojshme për të plotësuar 100% nevojat e brendshme, duke e quajtur të gjithën një legjendë mediatike.
Edi Rama: Mirëmëngjesi nga PS. Shqipëria prodhon 75 përiqnd të nevojave të veta në një vit të mirë hidrik dhe 65 përqind në një vit të thatë. Po ne do ta prodhojmë vetëm të gjithë energjinë brenda 2030 ku do të kemi fituar sovranitetin energjetik me realizimin e investimeve të programuar për energjinë nga dielli dhe era, dhe dy modelet inovative të pompimit të ujit në kaskadën e Drinit dhe Devollit ku po punojmë me partnerët tanë norvegjezë.
Ulja me 10.5 përqind e çmimit të energjisë është historike, sepse është e para ulje në 35 vite dhe e vetmja e bërë në këtë pjesë të botës pas krizës në luftës në Ukrainë. Është fryt i një arritje historike të transformimit rrënjësor të sektorit në dekadën e fundit. Është 10.5 përqind ulje dhe është çmimi më i ulët historik i energjisë, ndaj jam shumë krenar që e arritëm kur mendoj që u nisëm nga buza e humnerës. Ne nuk e prodhojmë vetë për të gjitha nevojat tona energjinë, kjo është një legjendë mediatike. Sot 10 përqind e prodhimit vjen nga dielli, ishte 0 deri para pak vitesh. Deri në 2030 do të arrijmë në 30 përqind. Sot jemi të parët në rajon për vetëprodhim të energjisë nga dielli nga familjarët dhe bizneset.
