Davide Ballardini nuk është më trajner i Genoa. Trajneri u shkarkua në fund të ndeshjes së barazuar nga kuqeblutë kundër Empolit në “Castellani”. Andryi Shevchenko do ta zërë vendin e tij në stolin e “Grifone”.
Një emërim surprizues, sepse ishin përfolur Pirlo dhe Gattuso për atë pozicion. Ukrainasi, ish-sulmues i shquar me Milanin, ishte në kërkim të një eksperience të re, pasi dha dorëheqjen nga stoli i kombëtares së vendit të tij, menjëherë pas “Euro 2020”.
Një emër me prestigj të madh për stolin kuqeblu, ai i Shevchenkos, i kërkuar shprehimisht nga pronarët e rinj amerikanë “777 Partners”. Këta të fundit, më 15 nëntor do të bëhen zyrtarisht pronarë të klubit të Serie A.
Ideja e Josh Wander dhe bashkëpunëtorëve të tij, përballë vështirësive evidente të skuadrës, ishte të fokusoheshin në një profil me famë të madhe ndërkombëtare, me aftësinë për të përfaqësuar profilin e një klubi që do të ndryshojë rrënjësisht fytyrën e tij edhe jashte vendit.
Fituesi i “Topit të Artë” në vitin 2004 kishte pasur një takim me drejtuesit e Monza para Genoa, ndaj fillimisht u mendua si një alternativë e mundshme për pankinën lombarde. Por, në fund, sharmi i një klubi mbi 100-vjeçar dhe potenciali i madh i ofruar nga ky ndryshim i afërt i pronësisë, e bindi Shevchenkon.
Ish-sulmuesi kuqezi udhëhoqi Ukrainën deri në çerekfinale të Kampionatit Europian, që u zhvillua kësaj vere. Ai pranoi rikthimin në Itali, një vend me të cilin është shumë i lidhur.
g.kosovari
