Tirana është matematikisht kampione e Shqipërisë për edicionin futbollistik 2021-2022 në Abissnet Superiore. Bardheblutë mundën me përmbysje 2-1 rivalët e përjetshëm të Partizanit, në një ndeshje të jashtëzakonshme me raste e gola fantastikë në “Elbasan Arena”.
Titulli i 26 për Tiranën, që feston të dytin kampionat në tre vitet e fundit, por edhe hakmarrjen ndaj Partizanit, që vetëm 3 sezone më parë fitoi titullin pikërisht në derbin e fundit të sezonit.
Nuk mungon as spektkali i tifozëve, të cilët për shkak të ndezjes së mjeteve piroteknike sollën ndërprerjen e ndeshjes për disa minuta. Vërshëllima e trefishtë e Eldorian Hamitit kishte melodinë e titullit për Tiranën, që veshi derbin me ngjyrat bardheblu, por mbi të gjitha kurorëzoi sezonin në mënyrën më të mirë të mundshme. Festa legjitime e 26-herë kampionëve, me tifozët që në fund së bashku me lojtarët ndezën festën e shfrenuar, në një ndeshje që vlen më shumë se 90 minuta.
