Humbja 1-0 e pësuar 17 gushtin e kaluar në fushën e Skënderbeut, duket se është një kujtim i largët për Partizanin. “Demat”, në fakt, kanë marrë pesë fitore dhe një barazim në Kategorinë Superiore që nga ajo sfidë.
Suksesi i fundit ka ardhur pasditen e sotme, me skuadrën e Gegës që ka mundur 3-0 ekipin e Teutës në shtëpi. Një sfidë kjo që ka patur për protagonist sulmuesin 23-vjeçar Jasir Asani-n, i cili ka fundosur “Djemtë e Detit” me dy golat e shënuar në pjesën e parë, respektivisht në minutën e 29-të dhe atë të 42-të.
Në pjesën e dytë ka ardhur edhe goli i tretë për vendasit, të cilët kanë shënuar me Mensah në të 82-ën. Kështu, Partizani ka marrë fitoren e tretë radhazi në kampionat dhe falë këtyre tri pikëve kryeson renditjen me 16 pikë, 3 më shumë se Kukësi i vendit të dytë, që do të luajë nesër në fushën e Skënderbeut.
Ndërkohë, kjo ka qenë humbja e tretë në kampionat për Teutën, që mban vendin e shtatë me 8 pikë pas shtatë javëve të para.
/b.d
