Presidenti i vetëshpallur në detyrë i Afganistanit është shprehur për mediat se sundimi i talebanëve nuk do të zgjasë shumë, pasi metodat e tyre janë të papranueshme për njerëzit.
Amrullah Saleh ishte nënkryetar i shtetit para se ta merrnin kontrollin talebanët, duke detyruar edhe Presidentin Ashraf Ghani të ikte nga vendi.
Saleh, duke folur nga Lugina Panjshir, një zonë që aktualisht nuk është nën kontrollin e talebanëve tha se ligji i talebanëve është Emirati Islamik, që është krejtësisht i papranueshëm për njerëzit në Afganistan, si dhe zgjedhja e një udhëheqësi nga një grup është po e papranueshme. Ai mendon se është e pamundur që sundimi taleban të zgjasë shumë në Afganistan.
Sipas tij, talebanët fshihen pas sulmit terrorist që ndodhi në aeroportin e Kabulit, i cili vrau më shumë se 100 afganë dhe 13 ushtarë amerikanë.
I ashtuquajturi grupi i Shtetit Islamik në Afganistan mori përgjegjësinë për sulmin.
I pyetur se për çfarë arsye nuk u largua nga vendi, ai u shpreh: “Unë jam një ushtar i Ahmad Shah Massoud” dhe sipas tij, largimi nga vendi nuk ishte një ide e mirë./m.j
