Një vit më parë, Peskara ishte e mbushur me heronj. Ledian Memushaj & CO trajtoheshin si të tillë nga i gjithë qyteti, për vetë atë që po bënin me skuadrën e tyre në Serinë B. Fitore të njëpasnjëshme dhe suksese që e mbajtën ekipin me shpresën se sezoni 2015-2016 do të ishte i artë, më shumë sesa i mëparshmi kur kjo skuadër nuk ia doli në fazën “play off” që të siguronte ngjitjen në elitën e futbollit italian.
Mbrëmë, Peskara kishte organizuar një darkë për festat e fundvitit, por tifozët e kësaj skuadre nuk janë pajtuar me një festë. Duke parë ecurinë aspak pozitive që po kalojnë “delfinët” në elitën e futbollit italian, i kanë rezervuar një pritje aspak miqësore stafit të ekipit dhe lojtarëve. Mes të cilëve, edhe kapitenit, mesfushorit të Kombëtares shqiptare, Ledian Memushaj. Lideri i këtij ekipi nuk e zmadhon situatën dhe ruan qetësinë. “Nuk ka ndodhur asgjë, pa merak”, shprehet ai menjëherë sapo hap telefonin.
Mirëmbrëma Ledian, si jeni?
Mirëmbrëma! Shumë mirë.
Çfarë ndodhi përpara se të hynit në festë?
Asgjë. Nuk kishte asgjë.
Në mediat italiane është raportuar se ju kanë pritur disa tifozë, të cilët kanë tentuar të godasin makinën tuaj dhe të trajnerit apo lojtarëve të tjerë?
Jo, Jo. Nuk është kaq e madhe. E kanë ekzagjeruar.
A mund të na e shpjegoni pak situatën?
Ishin disa tifozë përpara se ne të futeshim në atë ambient. Gjithashtu, kishte edhe forca policie. Mes atyre njerëzve që ishin, dy apo tre tentuan të afroheshin te makinat. Kaq!
Juve ju goditën?
Jo, mua jo. E thashë, kishte forca policie që ndërhynë.
A pati ndonjë person të skuadrës që pësoi ndonjë dëmtim?
Jo, jo fare! Rrini të qetë, nuk ka ndodhur asgjë e tillë siç po thoni ju.
Dakord, por thjesht po u referohemi raportimeve që kanë bërë mediat italiane mbi ngjarjen…
Jo, jo, e kanë zmadhuar.
A vijoi mbrëmja?
Po, vijoi. E them edhe një herë që gjithçka ndodhi në vetëm pak minuta dhe nuk ishte asgjë kaq e madhe.
Po në dalje patët problem?
Jo, fare. Aktualisht sapo mbërrita në shtëpi. Jua them me sinqeritet që gjithçka ka ndodhur ishin vetëm dy apo tri shqelma kundrejt dy-tri makinave tona. Kaq!
Pse mendoni se ka ndodhur diçka e tillë?
Shikoni, skuadra nuk po kalon një periudhë të mirë dhe kjo na ka zemëruar të gjithëve. Askush nuk pëlqen që të mundemi, apo që të mos arrijmë rezultatet që duam.
A ka pasur ndonjë takim mes përfaqësisë së tifozëve dhe jush si kapiten apo me drejtuesit e klubit?
Në dijeninë time nuk është bërë dhe nuk është planifikuar asnjë e tillë.
Panoramasport/d.i.
