Shtatë persona janë vrarë dhe disa të tjerë janë plagosur nga të shtënat në një sallë mbledhjesh të Dëshmitarëve të Jehovait në qytetin gjerman të Hamburgut.
Policia bëri me dije se personi i armatosur veproi i vetëm në sulmin e së enjtes.
Ai është një ish-anëtar i komunitetit fetar, i moshës midis 30 dhe 40 vjeç, raporton revista Der Spiegel.
Viktimat ende nuk janë identifikuar, ndërsa puna vijon për zbardhjen e rrethanave të plota të ngjarjes.
Policia thotë se në vendngjarje ka gjetur një person të vdekur për të cilin mendon se mund të ketë qenë autori i krimit të rëndë.
“Policët kanë dëgjuar edhe një të shtënë nga pjesa e sipërme e pallatit dhe janë ngjitur në katin e sipërm, ku kanë gjetur të vdekur dhe një tjetër person. Deri më tani nuk kemi të dhëna se ndonjë autor ka ikur”, thuhet në njoftimin e policisë gjermane.
Mendohet se njerëzit ishin mbledhur, ndoshta për një studim biblik, kur të shtënat filluan rreth orës 21:00 me kohën lokale.
Lara Bauch, një studente 23-vjeçare që jeton aty afër, i tha agjencisë së lajmeve DPA se “ka pasur rreth katër të shtëna me armë zjarri – me boshëllëqe kohore rreth 20 sekonda deri në një minutë”.
/a.r
