Sulmet e fundit në Bruksel kanë bërë që policia edhe në Kosovë të rrisë kapacitetet e saj në mbarë territorin. Ekspertët e sigurisë thonë se as Kosova nuk është imune, prijësit fetarë bëjnë thirrje në edukimin e drejtë të fëmijëve mbi këtë ideologji vrastare.
Pas sulmeve terroriste në Bruksel, Evropa ka rritur me të madhe masat e sigurisë, nën kërcënim të vazhdueshëm të terrorizmit. Imune ndaj këtyre sulmeve, sipas ekspertëve, nuk është as Kosova. As Policia e Kosovës nuk e ka mohuar faktin se sulme të tilla mund të ndodhin edhe në Kosovë.
Ajo ka ngritur në këmbë të gjitha kapacitetet e saj dhe ka shtuar forcat nëpër objektet e rëndësisë së veçantë por edhe në vendet e ndjeshme si aeroporti apo pikat kufitare.
Ndërkohë, sipas gazetarëve të cilët njohin mirë rrehtanat e ekstremizmit dhe terrorizmit, një sulm terrorist në Kosovë nuk do të ishte fare i vështirë të realizohej, pasi që ndodhi në Bruksel edhe pse ka pasur paralajmërime të mëhershme në këtë drejtim.
Kurse krerët fetarë myslimanë kanë dënuar edhe një herë aktet e tmerrshme në Bruksel duke ftuar imamët e tjerë që të ngrenë zërin për të mirën e vendit dhe fesë së tyre. /Zëri