Një seri sulmesh me dronë rusë ka shënjestruar infrastrukturën energjetike në disa rajone të Ukrainës gjatë natës së Vitit të Ri, deklaroi të martën Presidenti ukrainas Volodymyr Zelensky. Ndërkohë, Moska akuzoi Kievin për kryerjen e një sulmi vdekjeprurës me dron në një zonë të rajonit Kherson që ndodhet nën kontrollin rus.
“Në natën e Vitit të Ri, Rusia po sjell qëllimisht luftë. Mbi 200 sulme me dron u kryen kundër Ukrainës gjatë natës”, shkroi Zelensky në një postim në Telegram. Ai bëri të ditur se infrastruktura energjetike ishte goditur në shtatë rajone të vendit.
Nga ana tjetër, autoritetet ruse deklaruan se të paktën 24 persona, përfshirë edhe një fëmijë, u vranë në një sulm me dron ukrainas që goditi një hotel dhe një kafene në rajonin e Khersonit të kontrolluar nga Rusia, ku civilët po festonin ndërrimin e viteve.
Ndërkohë, Ministria e Mbrojtjes e Ukrainës njoftoi se ka vendosur dy sisteme shtesë kundërajrore Patriot, të siguruara nga Gjermania si pjesë e ndihmës ushtarake të premtuar më herët. “Dy sisteme të tjera Patriot janë vendosur për të mbrojtur qytetet ukrainase dhe infrastrukturën kritike”, thuhet në deklaratën e publikuar në Telegram.
Ministri i Mbrojtjes, Denis Shmyhal, falënderoi qeverinë gjermane për lehtësimin e dorëzimit të sistemeve, ndërsa Berlini kishte njoftuar që në muajin gusht se do t’i siguronte Ukrainës dy sisteme të tilla të mbrojtjes ajrore.
