Ministrja e Drejtësisë Etilda Gjonaj ka reaguar pas akuzave të selisë blu se “procesi i Vettingut po konfirmon në detyrë shërbëtorët e kryeministirt Edi Rama”. Deklarata e selisë blu erdhi pas konfirmimit në detyrë të anëtarit të Gjykatës së Lartë Ardian Dvorani, një magjistrat i sulmuar prej kohësh nga e djatha, edhe shumë kohë para nisjes së procesit të Vettingut.
Lidhur me akuzat e opozitës, ministrja Gjonaj tha se synimi i saj është shkatërrimi i kuadrit të ngritur për largimin e të korruptuarve nga drejtësia.
Gjonaj tha se nuk ka asnjë kthim prapa për Vettingun, që sipas saj është qëllimi kryesor i opozitës me shantazhet që po bën.
“Vettingu po rikthen shpresën, dhe sa më shumë shtohen shembujt që ushqejnë shpresë, aq më shumë shtohen edhe fletërrufetë. Sot jemi të gjithë dëshmitarë për pogresin e rëndësishem nga Vettingu. Opozita akuzon qeverinë për kapjen e drjetësisë, po si e kap kryeministri dhe qeveria përmes zbatimit strikt të një kaudri ligjor të votuar edhe nga kjo opozitë.
Që opozita nuk e donte Vettingun kjo dihet botërisht, që votoi me pahir reformën, edhe vettingun, edhe përfshirjen e ONM, edhe kjo dihet botërisht. Që opozita sot kërkon me dëshpërim shkatërrimin e këtij kuadri ligjor të konsideruar revolucion, dhe kjo është përditë e më e qartë.
Shantazhet e vazhdueshme, kërcënimet e përditshme, bllokimet e imagjinuara si mundësi për të imponuar kthimin prapa nuk ka asnjë mundësi të funksionojnë.
Kjo është zgjedhje fatkeqe që ka bërë opozita, por fatmirësisht Vettingu nuk kapet dot nga askush, dhe nuk ndalet dot nga askush, sepse vettingu mbrohet nga sytë e ndërkombëtarëve”, deklaroi Gjonaj./a.m.
