Një sulm ajror izraelit në qytetin jugor të Khan Younis në Gaza ka vrarë udhëheqësin e lartë politik të Hamasit, Salah al-Bardaweel.
Sipas asaj që raporton BBC, vendasit thonë se sulmi ajror vrau Bardaweel, një anëtar i zyrës politike të grupit, si dhe gruan e tij teksa zyrtarët izraelitë nuk kishin asnjë koment të menjëhershëm.
Ushtria izraelite rifilloi sulmet në Gaza të martën, duke fajësuar Hamasin për refuzimin e zgjatjes së fazës së parë të një armëpushimi që hyri në fuqi më 19 Janar dhe zgjati pothuajse dy muaj.
Hamasi hodhi poshtë akuzat izraelite dhe, nga ana tjetër, akuzoi Izraelin për shkelje të marrëveshjes që u ndërmjetësua nga Katari, Egjipti dhe SHBA.
Ndërkohë një zyrtar në ministrinë e Shëndetësisë të drejtuar nga Hamasi tha se 32 palestinezë janë vrarë gjatë 24 orëve të fundit në pjesë të ndryshme të Rripit të Gazës.
