Dy terroristë kanë plagosur tre turistë të huaj me thikë në Hurghada të Egjiptit, pranë Detit të Kuq.
Ministria e Brendshme tha personat, të pajisur me thika, kishin hyrë të premten në hotelin Bella Vista dhe i kanë sulmuar turistët.
Forcat e sigurisë kanë hapur zjarr ndaj agresorëve duke e vrarë njërin dhe tjetrin e kanë plagosur rëndë. Tre turistët, dy nga Austria dhe një nga Suedia, janë plagosur nga thika, por plagët e tyre nuk janë serioze.
Sipas raportimeve të mediave ndërkombëtare, prapa këtij sulmi qëndrojnë terroristët e ISIS.
Në Egjipt ka pasur valë të sulmeve terroriste që nga rrëzimi i presidentit Muhammad Morsi, në korrik të vitit 2013.
BBC shkruan se autorët kishin si synim të merrnin pengë turistët. Forcat e policisë janë vënë në kërkim të personave të tjerë, të cilët dyshohet se kanë qenë pjesë e sulmit.
Prej kohësh, Egjipti po përballet me militantët e Shtetit Islamik me bazë në gadishullin e Sinait.
