Grupi terrorist, Shteti Islamik (ISIS), e ka marrë përgjegjësinë për sulmin vdekjeprurës të kryer sot nëpërmjet një furgoni në qytetin e Barcelonës. Agjencia e lajmeve e ISIS’it, Aamaq, ka raportuar se grupi famëkeq qëndron prapa sulmit që përgjaku qytetin spanjoll sot. Policia katalunase e ka konfirmuar zyrtarisht se si pasojë e sulmit terrorist në Barcelonë, 13 persona kanë mbetur të vrarë dhe 50 të tjerë janë plagosur.
Ngjarja e rëndë ka ndodhur pasdite në Las Ramblas, njërën prej rajoneve më të frekuentuara në qendër të qytetit. Një kohë pas sulmit, policia tha se bëhet fjalë për ‘akt terrorist’. Dy persona janë arrestuar në lidhje me sulmin. Njëri prej tyre edhe është identifikuar.
***
Sekretari amerikan i shtetit ka ngushëlluar familjarët, dhe ka dënuar sulmin. “Ngushëllime familjarëve Tillereson, terroristët do zbulohen dhe do vendosen para drejtësisë” tha Tillerson
***
Driss Oukabir është njëri nga autorët e sulmit në Barcelonë. Mediat lokale raportojnë se ai është prangosur.
Driss Oukabir ka lindur në Marok në vitin 1989, ndërsa nga të dhënat e para ishte i skeduar nga policia spanjolle si pjesë e grupeve terroriste.
Oukabir mësohet se ka qenë drejtuesi i mjetit që shtypi qytetarët ndërsa e kishte marrë atë me qira në qytetin Santa Perpetua de la Mogada.
Të paktën 13 persona kanë vdekur dhe 60 të tjerë të plagosur janë regjistruar pasditen e kësaj të enjteje në Barcelonë, kur një furgon është përplasur me këmbësorët në një zonë turistike.
Dëshmitarë nga vendngjarja kanë publikuar foto dhe video nga momenti i tmerrit, ndërsa atje shkuan automjetet e emergjencës, pas përplasjes së ndodhur në sheshin ikonë “Las Ramblas” të frekuentuar shumë nga turistët.
Autoritetet konfirmojnë jozyrtarisht se bëhet fjalë për një sulm terrorist në kryeqendrën e Katalunjës.
Linjat e metrosë u mbyllën menjëherë, sikurse edhe dyqanet përreth zonës, ndërsa këmbësorët vraponin nga të katër anët në kërkim të strehimeve të sigurta, teksa policia zbarkoi me forca të shumta në zonë.
Dëshmi nga vendngjarja tregojnë se një furgon u drejtua përmes turmës së këmbësorëve, në momentin që ata kalonin nga njëri trotuar në tjetrin. Policia konfimoi përplasjen “masive”, por dëshmitarët thonë se kanë dëgjuar edhe të shtëna armësh.
Gazeta “El Pais” njofton se drejtuesi i mjetit është larguar në këmbë pasi përplasi dhjetëra këmbësorë, ndërsa raporte të tjera thonë se dy persona të armatosur kanë hyrë në një restorant pas ngjarjes së mëparshme. Ndërkohë “Daily Mail” konfirmon se policia po negocion me dy pengmarrës brenda një restoranti turk.
Edhe pse detajet e incidentit nuk janë momentalisht të qarta, përdorimi i automjeteve për të shkaktuar panik dhe viktima në vendet e BE-së është përdorur që nga korriku i vitit 2016, në një seri sulmesh terroriste nga militantë islamikë, duke vrarë mbi 100 persona në Nice, Berlin, Londër dhe Stockholm.
Javët e fundit, grafite kërcënuese ndaj turistëve janë parë në Barcelonë, aty ku shkojnë të paktën 11 milionë turistë në vit. Në një video të publikuar nën sloganin “turizmi vret fqinjësinë”, disa individë kanë ndaluar një autobus me turistë në Barcelonë, duke shpuar gomat dhe duke vizatuar me spraj nëpër xhamat e tij. /b.d
KUJDES! PAMJE TË RËNGA NGA VENDI I NGJARJES:
https://www.youtube.com/watch?v=uDOTKAHYU9Y
