Televizioni shtetëror gjerman ZDF i ka kushtuar një reportazh të gjerë kombëtares së Shqipërisë për arritjen historike në finalet e Euro 2016. Shqipëria arriti të bënte realitet një ëndërr, për të cilin të gjithë flisnin. Falë formulës së re të UEFA-s, me një Europian me 24 skuadra, përfaqësuesja arriti të kualifikohej, madje edhe kur skuadra si Holanda nuk ia dolën dot mbanë. Në reportazhin e xhiruar në fillimin e këtij janari, Tirana përshkruhet si një qytet i zhurmshëm, por jo aq sa ishte në tetor, kur Shqipëria festoi kualifikimin në Europian pas suksesit 3-0 ndaj Armenisë. Një panoramë e plotë rreth ekipit kuqezi, me intervistat e protagonistëve. Nga ata që janë lindur jashtë Shqipërisë dhe u formuan si futbollistë në vende të ndryshme europiane. Shkëlzen Gashi, i lindur në Zyrih dhe që flet me theksin zviceran, por edhe Mërgim Mavraj që hapat e parë si profesionist i hodhi në Gjermani.
Rreth suksesit të ardhur nga lojtarët e rritur jashtë Shqipërisë ka folur edhe ish-kapiteni kuqezi dhe legjenda e Hanoverit, Altin Lala, sipas të cilit në mënyrë të drejtpërdrejtë ndikoi formimi i futbollistëve në vende si Gjermania, Zvicra apo Italia. Mes personazheve, edhe presidenti i Federatës Shqiptare të Futbollit, Armand Duka, njeriu që prej 14 vjetësh është në krye të institucionit dhe ka pjesën e tij të meritave në ngritjen e emrit të Shqipërisë në arenën ndërkombëtare. Aty ndodhet edhe Gianni De Biasi, trajneri që integroi në ekip disiplinën e fort taktike dhe i dha mundësi ekipit të shfaqte pikat e tij më të forta. Edhe pse e kupton shqipen, tekniku kuqezi pohon se gjuha është tejet e vështirë, por puna lehtësohet, sepse përgjithësisht lojtarët e kuptojnë italishten. Lorik Cana iu rikthye ngjarjeve të tetorit 2014 në Beograd: situatën shumë të rënduar në stadium, dhunën dhe koret antishqiptare. Kapiteni kuqezi nënvijëzoi se, prej faktit që shumë lojtarë të Kombëtares janë nga Kosova, ndaj Serbisë nuk ishte thjesht një ndeshje futbolli. Sipas ZDF, Shqipëria arriti me pak fat në Europian, edhe pse shqiptarët nuk e mendojnë kështu. Por, në reportazh rikujtohet se në histori Kombëtarja ka rezervuar mjaft surpriza. Si ndeshja e vitit 1967, ku Shqipëria barazoi 0-0 me Gjermaninë Perëndimore, duke i detyruar nënkampionët e botës në atë kohë të qëndronin jashtë Euro 1968. Ajo ndeshje e jashtëzakonshme është rikujtuar nga ish-lojtari kuqezi, Frederik Gjinali, të cilit iu mohua edhe një gol. Gazetarët gjermanë ndoqën edhe ndeshjen e Kategorisë Superiore, ku Partizani fitoi me Laçin, ndërsa pjesë e dokumentarit ishte edhe rivaliteti në familjen Xhaka, ku Taulanti dhe Graniti do të jenë rivalë në Euro 201”, kur Shqipëria të ndeshet në grup me Zvicrën.
